लक्ष्मीको आराधना र दीपावली गरि लक्ष्मीपूजा पर्व मनाइयो, गाईतिहार सम्पन्न

Posted on: October 19, 2017 | views: 292

काठमाडौं । 

तिहारको तेस्रो दिन साँझ ऐश्वर्य, धनधान्य र सम्पन्नताकी देवी लक्ष्मीको पूजा आराधना गरी घर, कार्यालय तथा घरदेखी टाढा रहेकाव्यक्तिहरुले कोठामा श्रद्धा भक्तिपूर्वक लक्ष्मीपूजा पर्व मनाएका छन् ।


हिन्दू धर्मअनुसार सफासुग्घर र लिपपोत नगरिएको घरमा लक्ष्मीले बास गर्दिनन् भन्ने मान्यताका आधारमा लक्ष्मिपूजाको दिन बिहानै घर सफा, सुग्घर र लिपपोत गरी दीपावली गरेर लक्ष्मीलाई आमन्त्रण गरेपछि विधिपूर्वक लक्ष्मी पूजा गरिन्छ । 


विशेषगरी घरका झ्याल, ढोका, चोटा, कोठा, सङ्घार, कौसी, अटाली र भर्याङलगायतका स्थानमा सर सफाइ गरी दीपावलीसमेत गरेपछि लक्ष्मी घरमा प्रवेश गर्ने विश्वास रहिआएको छ । 






लक्ष्मी पूजाका लागि साँझ आँगनदेखि मूलढोका हुँदै लक्ष्मी स्थापना गरिने पूजा कोठा वा ढुकुटीसम्म गाईको गोबर र रातोमाटाले लिपपोत गरेर चामलको पीठो एवम् अबीरले लक्ष्मीको पाइला बनाई लक्ष्मी आउने बाटो देखाउने परम्परा छ । 



गाईतिहारः गाईको पूजा गरी मनाइयो


लक्ष्मिपुजाको दिन गाईको पूजा गरी गाईतिहार पर्व मनाइएको छ । 


हिन्दुहरु गाईलाई लक्ष्मीको प्रतीकका रुपमा पूजा गर्दछन् । गाईलाई सिंगारपटार र पूजाआजा गरी माला लगाई मीठो खानेकुरा खुवाइन्छ ।




मृत्युपछिको कष्टमय सागरबाट मूक्ति पाउने धार्मिक विश्वासका साथ रक्षाबन्धनका दिन बाँधेको डोरोलाई आजै गाईको पूच्छरमा बाँधिन्छ ।


लक्ष्मिपूजाकै दिन विष्णुका परम भक्त बलिबाट विष्णुलाई लक्ष्मीले मूक्त पारेको सम्झनास्वरुप महिलाहरु साँझमा घर–घरमा भई भैलो खेली सुख, शान्ति र सम्पन्नताको कामना गर्ने गर्दछन् ।