निर्वाचन आयोगद्धारा सरकारलाई २७ बुँदे निर्देशन, राष्ट्रपतिसँग आयोग पदाधिकारीको भेट

Posted on: October 14, 2017 | views: 223

काठमाडौं । निर्वाचन आयोगले आगामी मङ्सिरमा हुने प्रतिनिधिसभा तथा प्रदेशसभा सदस्य निर्वाचनको व्यवस्थापनको आवश्यक प्रबन्ध मिलाउन नेपाल सरकारलाई २७ बुँदे  निर्देशन जारी गरेको छ ।


प्रमुख निर्वाचन आयुक्त डा।अयोधीप्रसाद यादवको अध्यक्षतामा बसेको वैठकले आयोगले जारी गरेको निर्देशन कार्यान्वयनका लागि मुख्य सचिव मार्फत् नेपाल सरकार समक्ष लेखी पठाउने निर्णय गरेको आयोगका प्रवक्ता सहसचिव नवराज ढकालले जानकारी दिनुभयो ।


आयोगले निर्वाचनको सन्दर्भमा आयोगबाट भएका निर्णय र अन्तर्गतका कार्यालयबाट भएका पत्राचारलाई नेपाल सरकारका सम्पूर्ण निकाय, सार्वजनिक संस्थान, विकास समिति, स्थानीय निकाय, शैक्षिक संस्थानहरूले उच्च प्राथमिकता दिई तत्काल कार्यान्वयन गर्न निर्देशन दिएको छ ।


प्रधानमन्त्रीबाट सरकारी कामको सिलसिलामा सरकारी हेलिकप्टर तथा राजनीतिक कामका सिलसिलामा निजी हेलिकप्टर प्रयोग गर्नुपर्दा आयोगको पूर्व स्वीकृति लिन र प्रधानमन्त्री तथा मन्त्रीको प्रमुख आतिथ्यता नहुने गरी कार्यक्रम सञ्चालन गर्ने व्यवस्था मिलाउन पनि आयोगले सरकारलाई भनेको छ ।


निर्वाचन आयोग, निर्वाचन अधिकृतको कार्यालय तथा जिल्ला निर्वाचन कार्यालयमा बिजुली, धारा, डाँक, टेलिफोन तथा इन्टरनेट सेवा निर्वाध उपलब्ध गराउन, सार्वजनिक सञ्चारका माध्यम रेडियो नेपाल, नेपाल टेलिभिजन, गोरखापत्र, दि राइजिङ्ग नेपाल, राष्ट्रिय समाचार समिति लगायतले निर्वाचन सम्बन्धी सूचनालाई प्राथमिकता दिई प्रकाशन तथा प्रसारण गर्ने व्यवस्था मिलाउन पनि आयोगले सरकारलाई निर्देशन दिएको छ ।


राष्ट्रपतिसँग आयोगका पदाधिकारीहरूको भेट

काठमाडौं । राष्ट्रपति विद्यादेवी भण्डारीसँग निर्वाचन आयोगका पदाधिकारीहरुले आज राष्ट्रपति कार्यालय, शीतलनिवासमा भेट गर्नुभएको छ ।


भेटमा राष्ट्रपति भण्डारीले राजनीतिक वातावरण आफ्नो हिसाबले चलायमान हुने हुँदा त्यसमा नअल्मलिई निर्वाचन सम्पन्न गर्ने कार्यमा लाग्न निर्वाचन आयोगलाई आग्रह गर्नुभयो ।


राष्ट्रपतिले आगामी मंसिरमा हुने प्रतिनिधिसभा र प्रदेशसभा निर्वाचन तोकिएकै मितिमा सम्पन्न गरी आयोगको संवैधानिक दायित्व निर्वाह गर्न सुझाव दिनुभएको आयोगका प्रवक्ता नवराज ढकालले जानकारी दिनुभयो ।


निर्वाचनको मिति प्रभावित हुने काम नगर्न निर्वाचन आयोगको आग्रह

काठमाडौं । निर्वाचन आयोगले सरकार हेरफेर वा मन्त्रिमण्डल सदस्य थपघट लगायतका कारणबाट निर्वाचनको मिति प्रभावित नगर्न–नगराउन सम्वद्ध सबैमा पुनः आग्रह गरेको छ । 


प्रमुख निर्वाचन आयुक्त डा। अयोधीप्रसाद यादवको अध्यक्षतामा आज बसेको बैठकले आगामी मंसिर १० र २१ गते हुने निर्वाचनलाई स्वच्छ, निष्पक्ष, स्वतन्त्र, भयरहित र विश्वसनीय बनाउन सरकार, राजनीतिक दलहरू लगायत सरोकारवाला सबैको ध्यानाकर्षण गराएको छ । 


आयोगले प्रधानमन्त्री, विभिन्न राजनीतिक दलका अध्यक्षलगायत शीर्षस्थ नेताहरूले प्रतिनिधिसभा सदस्य र प्रदेशसभा सदस्यको निर्वाचन तोकिएकै मितिमा स्वच्छ, निष्पक्ष र भयरहित वातावरणमा सम्पन्न गर्न–गराउन गर्नुभएको प्रतिबद्धताप्रति आयोगले खुसी प्रकट गरेको प्रवक्ता नवराज ढकालले जानकारी दिनुभयो ।