प्रतिनिधि सभा सांसदलाई २५ लाख प्रदेशसभा सदस्यलाई १५ लाख खर्च

Posted on: October 13, 2017 | views: 248

काठमाडौं । निर्वाचन आयोगको आज बसेको बैठकले पहिलो हुने निर्वाचित हुने प्रणाली तर्फ प्रतिनिधिसभा निर्वाचनमा उम्मेदवारले बढीमा २५ लाख र प्रदेशसभा निर्वाचनमा बढीमा १५ लाख खर्च गर्न सक्ने सीमा निर्धारण गरेको छ ।


त्यसैगरी समानुपातिक निर्वाचन प्रणालीतर्फ समानुपातिक निर्वाचन प्रणाली बमोजिम हुने प्रतिनिधिसभा सदस्यको निर्वाचनमा राजनीतिक दलले पेश गरेको बन्दसूचीमा उम्मेदवारको संख्या अनुसार प्रति उम्मेदवार २ लाख रुपैंयासम्म खर्च गर्न सक्नेछ । 


त्यस्तै, प्रदेशसभा सदस्य निर्वाचनमा राजनीतिक दलले पेश गरेको बन्दसूचीमा उम्मेदवारको संख्या अनुसार प्रति उम्मेदवार १ लाख ५० हजार रुपैंयासम्म खर्च गर्न सक्नेछ ।


पहिलो हुने निर्वाचित हुने निर्वाचन तर्फ मतदाता नामावली खरिद, सवारी साधान, प्रचार प्रसार सामग्री, ढुवानी, गोष्ठी, कार्यालय सञ्चालन प्रतिनिधि परिचालनका लागि शीर्षकगत खर्च निर्धारण गरिएको आयोगका प्रवक्ता नवराज ढकालले जानकारी दिनुभयो ।