ठेकेदार शहिद ! हत्या गरिएका ठेकेदार गौचन शहिद घोषित, के हो शहिद भनेको ?

Posted on: October 13, 2017 | views: 505

काठमाडौं ।

शेरबहादुर देउवा सरकारले आपराधिक समुहले गोली हानी हत्या गरेका ठेकेदार शरद गौचनलाई शहिद घोषणा गर्ने निर्णय गरेको छ ।


राजधानीमा केही दिन अघि गोली हानी हत्या गरिएका ठेकेदार गौचन निर्माण व्यवसायी महासंघका अध्यक्ष थिए ।

शुक्रबार बसेको मन्त्रिपरिषद्को बैठकले गौचनलाई सहिद घोषणा गर्ने निर्णय गरेको हो ।


ठेकेदारहरुको संस्था निर्माण व्यवसायी संघले गौचनलाई सहिद घोषणाको माग गरेका थिए ।


के हो शहिद भनेको ?

देश र जनताको लागि बलिदान गर्ने वीर–विरङ्गनाहरु, जसले हाँसी–हाँसी आत्माहुति गर्न तत्पर हुन्छन् त्यस्ता महान् व्यक्तित्वहरुलाई सम्मान स्वरुप शहिद घोषणा गर्ने विश्वव्यापी परम्परा र मान्यता छ ।


यस विपरित नेपालमा भने कुनै पनि अपराधिक क्रियाकलापमा संलग्न व्यक्ति, कुनै घटनामा मारिएका व्यक्ति, व्यक्तिगत तथा राजनीतिक आग्रह पूर्वाग्रहका कारण हत्या गरिएका व्यक्तिहरुलाई पनि शहिद घोषणा गर्ने गरिएको छ ।


यति सम्मकी शहिद घोषणा माग गर्दै सडक आन्दोलन गरिन्छ र सर्वसाधारणलाई कष्टकर जीवनयापन गर्न बाध्य पारिन्छ । पीडित पक्षलाई राहत स्वरुप राज्यको तर्फबाट क्षतिपूर्ति दिनु अलग कुरा हो । तर, हरेक व्यक्तिलाई शहिद जस्तो ‘सम्मानजनक उपाधि’ दिन दबाव दिनु र सरकारले जथाभावी शहिद घोषणा गर्नु लाजमर्दो विषय हो । यसले देशको लागि बलिदान हुने शहिदहरु प्रति नै ठूलो अपमान हुनजान्छ ।