नेपाल–भारत प्रबुद्ध व्यक्ति समूह बैठक औपचारिकतामै सिमित

Posted on: October 08, 2017 | views: 208

काठमाडौं ।

नेपाल–भारत प्रबुद्ध व्यक्ति समूहको पाँचौँ बैठक आज काठमाडौमा सम्पन्न भएको छ । 


दुई दिनसम्म चलेको बैठकमा सन् १९५० को शान्ति तथा मैत्री सन्धि, सीमा व्यवस्थापन र सुरक्षा, जलस्रोत, दुवै मुलुकका राष्ट्रिय हितलगायतका विषयमा सौहार्द रुपमा छलफल भएको नेपाली समूहका संयोजक डा भेषबहादुर थापाले जानकारी दिनुभयो । 


बैठकका बारेमा जानकारी दिन आज आयोजित पत्रकार सम्मेलनमा नेपाली पक्षका संयोजक डा थापाले द्विपक्षीय कुनै पनि विषयलाई अध्ययनका आधारमा नयाँ आयाम दिन पहल भइरहेको जानकारी दिनुभयो । 


बैठकमा सीमा व्यवस्थापन बढी सुरक्षित र सहज बनाउने विषयमा गहन छलफल भएको थियो । 


बैठकमा नेपाल–भारत जलस्रोत सहयोग एवं उपयोग सम्बन्धमा समीक्षासमेत भएको थियो । नेपाली समूहका सदस्य एवं सांसद डा राजन भट्टराईले सीमा विवाद समाधानका बारेमा समग्रतामा छलफल भएको बताउँदै अन्तर्रा्ष्ट्रिय मान्यताका आधारमा सीमा व्यवस्थापन गर्नुपर्ने धारणा व्यक्त गर्नुभयो । 


बैठकमा नेपाली समूहका संयोजक थापा, सांसद भट्टराई, पूर्वमन्त्री नीलाम्बर आचार्य र पूर्वसचिव सूर्यनाथ उपाध्याय हुनुहुन्थ्यो भने भारतीय समूहका संयोजक एवं भारतीय जनता पार्टीका नेता भगतसिंह कोसियारी, प्राध्यापकद्वय महेन्द्र पी लामा र भुवनचन्द्र उप्रेती हुनुहुथ्यो । 


दुई देशबीचको सम्बन्धलाई समग्रतामा अध्ययन गरी सुझाब पेश गर्न समूहर गठन गरिएको हो ।