सप्तरीका शक्तिपीठहरुमा घुँइचो, दशौं लाख श्रद्धालुको आगमन

Posted on: September 30, 2017 | views: 228

राजविराट ।

धार्मिक महत्वको प्रसिद्ध शक्तिपीठहरुमा दर्शनार्थीको घुँइचो लागेको छ ।

विशेष गरी सप्तरीको छिन्नमस्ता, कंकालिनी राजविराज स्थित चण्डी भगवती मन्दिर र राजदेवी मन्दिरमा दर्शनार्थीको घुँइचो लागेको हो ।


मधेश आन्दोलनका कारण गत वर्ष भक्तजनको उपस्थिति कम देखिए पनि यसपल्ट शनिवार सम्ममा झण्डै ६० लाखको हाराहारीमा श्रद्धालु आएको छिन्नमस्ता भगवती मन्दिरका पीठाधीश महाकान्त ठाकुरले बताए । यहाँ हालसम्म करिव ७ हजार बली प्रदान समेत भइसकेको छ ।


नेपाल तथा भारतका हिन्दु धर्मावलम्वी माझ ख्याती प्राप्त यस मन्दिरमा दशैंका बेला ठुलो मेला लाग्ने गरेको छ । यसपल्ट पनि लागेको मेलामा श्रद्धालुको घुँइचो लागेको छ ।


यस्तै अर्को शक्तिपीठ कंकालनी मन्दिरमा समेत दर्शनार्थीको घुइचो लागेको छ । दशैंको फुलपाती देखि टिकासम्म दैनिक लाखौंको संख्यामा श्रद्धालुहरुको आगमन हुने र हालसम्म झण्डै ४० लाखको हाराहारीमा श्रद्धालु पुजा आजा तथा दर्शनका लागि आएको कंकालनी मन्दिर पुजा समितिका सदस्य वीरेन्द्र माझीले बताए ।


यहाँ विभिन्न श्रद्धालु भक्तजनहरुको मनोकांक्षा पुरा भएप्छि गरिएको भाकल अनुसार शनिवारसम्ममा ६ हजार भन्दा बढी छागर (बोका) र राँगाको बली प्रदान भइसकेको उनको भनाई छ ।


यस्तै राजविराज स्थित चण्डी भगवती र राजदेवी मन्दिरमा पनि भक्तजनको घुँइचो लागेको छ । यी मन्दिरहरुमा पनि हालसम्म ३ हजारभन्दा बढी बली प्रदान भएको सम्बन्धित पुजा समितिले जनाएको छ ।


स्थानीय निकायको चुनावले दशैंको शुरुवातमा शक्तिपीठहरुको प्रांगणमा लाग्ने मेलामा प्रभाव परे पनि परिणाम घोषणासँगै भक्तजनको भीड बढेको स्थानियको भनाई छ ।


विगतमा चाडपर्वका बेला भएका आपराधीक घटनालाई मध्ये नजर गर्दै शक्तिपीठहरु र आसपासमा सुरक्षाका लागि सादा पोसाकका प्रहरी समेत परिचालन गरी निगरानी बढाईएको प्रहरी उपरीक्षक मुकेश कुमार सिंहले बताए ।