बिबादास्पद सहकारी विधेयक सहित थारु र मुस्लिम आयोग बिधेयक पारित

Posted on: September 19, 2017 | views: 339

काठमाडौं ।

व्यवस्थापिका संसदको आजका पहिलोे बैठकले थारु आयोग विधेयक २०७४, मुस्लिम आयोग विधेयक २०७४ लाई सर्वसम्मतीले पारित गरेको छ ।


उपप्रधानमन्त्री एवं संघीय मामिला तथा स्थनीय विकास मन्त्री विजय कुमार गच्छदारका तर्फबाट भुमिसुधार तथा व्यवस्था मन्त्री गोपाल दहितले उक्त विधेयक परित गरियोस भनी संसदमा प्रस्ताव प्रस्तुत गर्नुभएको थियो ।


यसैगरी बैठकले सहकारी विधेयक २०७४ र केही नेपाल कानुनलाई संशोधन, एकिकरण, समायोजन र खारेज गर्ने विधेयक, २०७४ लाई समेत पारित गरेको छ ।


सहकारी तथा गरिबी निवारण मन्त्री अम्बिका बस्नेतले सहकारी विधेयक र कानुन न्याय तथा संसदीय मामिला मन्त्री यज्ञबहादुर थापाले केही नेपाल कानुनलाई संशोधन, एकिकरण, समायोजन र खारेज गर्ने विधेयक पारित गरियोस भनी प्रस्ताव प्रस्तुत गर्नु भएको थियो ।


बैठकमा विपद जोखिम न्युनीकरण तथा व्यवस्थापन विधेयक, राष्ट्रियसभा सदस्य निर्वाचन विधेयक र राष्ट्रपती तथा उपराष्ट्रपतीको निर्वाचन सम्बन्धी विधेयक गरी छुट्टाछट्टै तीनवटा विधेयक संसदमा प्रस्तुत भएको छ ।


गृहमन्त्री जनार्दन शर्माले संसदमा प्रस्तुत भएका तीनवटै विधेयकको अनुमति माग्ने प्रस्तावमाथि सांसदहरु प्रेम सुवाल, डिल्लीप्रसाद काफ्ले र अनुराधा थापामगरले प्रस्तुत गर्नुभएको विरोधको सूचना वैठकले अस्विकृत गरेको थियो ।


बैठकमा विकास समितिका सभापती रविन्द्र अधिकारीले स्थानीय शासन विधेयक सम्बन्धि समितिको प्रतिवेदन र सुशासन तथा अनुगमन समितिका सभापती मोहनसिंह राठौरले राष्ट्रपती, उपराष्ट्रपतीको पारिश्रमिक तथा सुविधा सम्बन्धी विधेयकको समितिको प्रतिवेदन पेश गर्नुभयो ।


यस्तै विधायन समितिको प्रतिवेदन सहितको देवानी कार्यविधि संहिता विधेयकको केही दफाहरुका सम्बन्धमा संसदले पुन विचारार्थ निर्देशन सहित देवानी सहित विधेयक र देवानी कार्यविधि संहिता विधेयक सम्बन्धीत समितिमा फिर्ता पठाएको छ । 

यसअघि बैठकमा सभामुख ओनसरी घर्तीले प्रधानमन्त्री तथा मन्त्रिपरिषदको कार्यालयबाट प्राप्त मन्त्रिपरिषद विस्तार सम्बन्धी पत्रको व्यहोरा पढेर सुनाउनु भयो ।

व्यवस्थापिका संसदको अर्को बैठक आजै १५ मिनेट पछी फेरी बस्ने छ ।