संविधान र निर्वाचन आचार संहिता बिपरित देउवाद्धारा मन्त्रीपरिषद विस्तार

Posted on: September 11, 2017 | views: 117

काठमाडौं ।

तेस्रो चरणको स्थानिय निकाय निर्वाचनको संघारमा संविधान उल्लंघन र निर्वाचन आचार संहिता

मिच्दै शेरबहादुर देउवाले पाँचौ पटक मन्त्रिपरिषद विस्तार गरेका छन् ।


प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले नवनियुक्त ३ मन्त्रीलाई पद तथा गोपनीयताको शपथ समेत गराएकी छिन् ।


शीलतनिवासस्थित राष्ट्रपति कार्यालयमा आज आयोजित विशेष समारोहमा राष्ट्रपति भण्डारीले राष्ट्रिय प्रजातन्त्र पार्टी (प्रजातान्त्रिक) का तर्फबाट नवनियुक्त विज्ञान तथा प्रविधि मन्त्री दीपक बोहरा, वन तथा भू–संरक्षण मन्त्री विक्रम पाण्डे र उद्योग मन्त्री सुनीलबहादुर थापालाई पद तथा गोपनीयताको शपथ गराएकी हुन् ।


यसैबिच निर्वाचन आयोगले निर्वाचन आचार संहिता लागू भइरहेको र सरकारलाई ७ बूँदे निर्देशन दिइसकेको अवस्थामा त्यसको विपरित ३ जना मन्त्री र एकजना राज्यमन्त्री नियुक्ति गरी मन्त्रिपरिषद् विस्तार गरेकोप्रति आयोगको ध्यानाकर्षण भएको जनाएको छ ।


आयोगले आज एक प्रेस–विज्ञप्ति जारी गरी मन्त्रिपरिषद् विस्तारको कार्यले स्वच्छ, स्वतन्त्र र निष्पक्ष निर्वाचनमा असर पर्न सक्ने हुँदा त्यस किसिमका कार्य नगर्न नगराउन सरकारलाई आग्रह गरेको छ ।


स्वच्छ, स्वतन्त्र र निष्पक्ष निर्वाचन गराउन सरकारले समेत सोही मनसाय राखी आफ्नो भूमिका निर्वाह गर्नुपर्ने आयोगबाट जारी विज्ञप्तिमा उल्लेख गरिएको छ ।


आयोगबाट यही भदौ १५ गते सरकारलाई दिएको ७ बूँदे निर्देशनमा नेपाल सरकारको स्वामित्वमा रहेका वा सरकारी कोष बाट खर्च हुने वा नेपाल सरकारबाट कुनै पनि राजनीतिक नियुक्ति नगर्ने बूँदा रहेको आयोगको विज्ञप्तिमा उल्लेख गरिएको छ ।


साथै, आगामी मंसिर १० र २१ गते सम्पन्न हुन गइरहेको प्रतिनिधि सभा तथा प्रदेश सभाको निर्वाचनको सिलसिलामा मिति २०७४ भाद्र १४ गतेदेखि निर्वाचन आचारसंहिता लागू भइरहेको पनि आयोगको विज्ञप्तिमा जनाइएको छ ।


नेपालको संविधान २०७२ को धारा ७६ को उपधारा ९ ले बढीमा २५ जना मात्र मन्त्री बनाउन पाउने स्पष्ट उल्लेख गरेको भएपनि प्रधानमन्त्री शेरबहादुर देउवाले यसको उल्लंघन गर्दै सबैलाई समेट्ने नाममा राज्य ढुकुटीमा लुट मच्चाउने गरि मन्त्री थप्दै गइरहेका छन् ।