जथाभावी गर्न नपाएपछि मन्त्री गच्छद्धार र बलायरद्धारा निर्वाचन आचार संहिताको बिरोध

Posted on: September 02, 2017 | views: 259

सप्तरी ।

निर्वाचन आयोगले मंसीरमा हुने प्रदेश सभा र प्रतिनिधिसभा निर्वाचनका लागि आचार संहिता लागू गरेपछि मन्त्रीहरुले जथाभावी सरुवा बढुवा तथा खर्च र उद्घाटन गर्दै हिँड्न नपाएपछि सरकारका मन्त्रीहरुले यसको बिरोध गर्न थालेका छन् ।


प्रधानमन्त्री शेरबहादुर देउवाले नै आचार संहिता उल्लंघन गर्दै पुल शिलान्यास गरेपनि त्यसको बचाउ गरिरहँदा सरकारको कामकाजमा बाधा परेको भन्दै सरकारका वरिष्ठ मन्त्रीले बिरोध जनाएका छन् ।


उपप्रधानमन्त्री तथा स्थानीय विकास मन्त्री विजयकुमार गच्छदारले निर्वाचन आयोगले ३ महिना अघि नै आचार संहिता लागु गरेर सरकारको कामकाजलाई समेत दखल दिएको भन्दै त्यसलाई सच्याउनु पर्ने जिकिर गरेका छन् ।


राजविराजमा पत्रकार सम्मेलनमा उपप्रधानमन्त्री गच्छदारले पर्सि बस्ने मन्त्रीपरिषद बैठकमा त्यसबारे कुरा उठाउने समेत बताए ।


आचार संहिताले कार्य सम्पादनमा प्रभाव पार्छः मन्त्री बलायर


डोटी ।

भौतिक पूर्वाधार तथा यातायातमन्त्री एबं नेपाली कांग्रेसका केन्द्रिय सदस्य बीर बहादुर बलायरले निर्वाचनसम्बन्धी आचार संहिताले  सरकारको कार्य सम्पादन र विकास निर्माणलाई प्रभाव पार्ने जिकिर गरेका छन् ।


नेपाल प्रेस युनियन डोटी शाखाले दिपायलमा गरेको पत्रकार भेटघाट कार्यक्रममा उनले निर्वाचनसम्बन्धी कार्यक्रम सरकार र आयोगको समन्वयमा तय गरिनुपर्ने बताउदै समन्वय बिना अकस्मात आचार संहिता आउदा सरकार अचम्मित भएको बताए ।


बिना जानकारी ल्याईएको आचार संहिताले सरकारका नियमित कार्यक्रमहरुलाई नराम्ररी प्रभावित पारेको उनको तर्क छ ।