“छोटा स्कट लगाएका हिरोइनको नाच हेर्न छाडेर, थोत्रो म्याक्सीवालीको नाच कस्ले पो हेर्छ ?”

Posted on: March 05, 2017 | views: 935

पप्पु गुरुङ्, २२ फागुन, दोधारा चाँदनी । दोधारा चाँदनीकी मान कुमारी बादी बिहान कुखुराको डाको अघि नै माग्नको लागि घरबाट हिड्छिन् । दोधारा चाँदनीको गाउँ, बस्तीमा पुग्दा नपुग्दै घाम चर्किसकेको हुन्छ । दिनभरी गाँउ बस्ती मागेर साँझ घर फर्किनुपर्छ । दोधारा चाँदनी नपा – ६ बादी बस्तीको एक बादी महिला मान कुमारी बादीको दैनिकी यस्तै बन्दै गएको छ् । दिनभरी गाँउ बस्तीमा चाहारेर संकलन भएको अन्न पात लिएर अबेर राती मात्रै घर फर्किने गर्छन उनि । मान कुमारी दिनभरी दोधारा चाँदनीको बिभिन्न वडा टोलमा माग्न नगए उनको घरमा आँगनको धुलोमा खेलेर बसेका छोराछोरी तथा नाती नतिनाको मुखमा माँड लगाउन कठीन छ् । मान कुमारी बादी जस्तै अरु बादी महिलाहरु दुख उस्तै छ । कामका लागि भारत गएका छोरा बुहारी पनि खासै राम्रो आम्दानी भएन । यसले मान कुमारीको बोझ झनै थपिएको छ् । आफ्नो श्रीमान लोक बहादुर बादीको केही महिना अघि खुट्टा भाचिएपछि उनलाई पर्नु दुख परेको छ् । उनका श्रीमान लोक बहादुर बादीको उपचार खर्च बिभिन्न ब्यक्तीहरुलाई सहयोगको आग्रह गरेपनि कसैले उनीहरुलाई सहयोग नगरेको मन कुमारी बादी दुख छ् । झिसमिसमै उठेर खानेकुरा बनाएपछि बालबालिकालाई ओछ्यानमै छाडेर मन कुमारी कुम्ला कटेरो बोकेर दोधारा चाँदनीको बस्तीमा माग्न पुग्छिन् । भन्छिन्,  “परिवारलाई मिठो मसिनो खुवाउन त मन छ नि, के गर्नु कर्म मै दु:ख र अभाव लेखेको रैछ । यी नानीहरुले धेरै दिन पेट भरी खान नपाएर बसेका छन् ।” दोधारा चाँदनीको बाबाथान बजार भन्दा करिब ४ किलो मिटर पुर्व उत्तर दिशा महाकाली नदीको छेउ एक सामुदायिक बनमा बादी बस्तीका प्राय जसो महिलाहरुको बेदना कसैले सुन्न तयार छैनन् । उनको छेउको घरमा बिद्युतको उज्यालो झलमल्ल हुन्छ तर उनको बस्तीमा टुकीमा जिवन बित्दै आएका छन् । उनिहरुको दैनिक एक छाक टार्न मुश्किल पर्ने यी महिलालाई पैसा कमाउला, बैंकमा जम्मा गरौला र स्थायी बसोबासको व्यवस्था गरौंला भन्ने छैन । आफ्नो घर बनाउने विषयमा के सोच्नु भएको छ भन्ने प्रश्नको जवाफमा उनीहरु भन्छन् “बिहान साँझ खान नपुग्ने कमाइले के को घर वासको आश गर्नु ?” मुलुकको नीति नियम बनाउने नेता, सभासद देखि त्यसको कार्यान्वयन गर्ने प्रशासकहरु सम्म दौडिन्छन् त्यहि बाटो भएर । तर बादी महिलाको जिवन परिवर्तनको यात्रा तय गर्न सकेन । बादी बस्तीको पीडा घट्नु साटो झन् झन् बढ्दो छ् । मान कुमारी बादीले भनिन्, “पहिला त बिहे, व्रतवन्ध र अन्य खुसीयालीमा नाच गान गरेर हामीले कमाउने गरेका थियौ । अहिले प्रविधिको विकास भयो । छोटा स्कट लगाएका हिरोइनको नाच हेर्न छाडेर, थोत्रो म्याक्सीवालीको नाच कस्ले पो हेर्छ र ?”