एसएलसीमा साढे सात हजार अयोग्य

Posted on: June 03, 2016 | views: 400

काठमाडौं । गत वर्ष एसएलसी परीक्षाको आवेदन फाराम भरेकामध्ये झन्डै साढे सात हजार विद्यार्थी अयोग्य रहेको पाइएको छ । परीक्षा नियन्त्रण कार्यालयका अनुसार देशभरमा कुल सात हजार चार सय विद्यार्थी अयोग्य भएको पाइएको हो । परीक्षा नियन्त्रक कृष्ण काप्रीले एसएलसीको परीक्षा फारम भरेका, तर हाजिरी नपुगेर उनीहरू अयोग्य देखिएको जानकारी दिए । ०७२ को एसएलसीमा नियमित र एक्ज्याम्टेडतर्फ गरी ६ लाख एक सय २२ परीक्षार्थी सहभागी भएका थिए ।  फारम पहिले नै भर्ने गरेको, तर त्यसपछि विद्यार्थीले स्वेच्छाले पढाइ छाडेकाले हाजिरी नपुग्ने गरेको उनको भनाइ छ । उनका अनुसार अयोग्यको संख्या अझ केही थपिन सक्छ । यस वर्ष साधारणतर्फ चार लाख ४० हजार ६ सय ४९ र एक्ज्याम्टेडतर्फ ५९ हजार चार सय ७२ सहभागी भएका थिए । असार पहिलो साता नतिजा गत चैतमा सञ्चालित परीक्षाको नतिजा छिटै निकाल्ने तयारी भइरहेको छ । 

अघिल्ला वर्षहरूमा भन्दा झन्डै दुई साता ढिला गरी सुरु भएको एसएलसी परीक्षाको नतिजा असार पहिलो साता सार्वजनिक हुने बताइएको छ । परीक्षा नियन्त्रक काप्रीका अनुसार उत्तरपुस्तिका परीक्षणको काम सम्पन्न गरेर नम्बर मार्क स्लिपमा इन्ट्रीको तयारी भएको छ । इन्ट्रीपछि म्याच–अनम्याच हेर्ने र टेबुलेसनको काम हुनेछ । एसएलसीको नतिजा ग्रेडिङ प्रणालीबाट यस वर्षदेखि साधारण विषयमा पनि ग्रेडिङ प्रणालीमा मूल्यांकन हुँदै छ । सुरुमा उत्तरपुस्तिका परीक्षकले दिएको नम्बर अंकमै मार्कसिटमा इन्ट्री गर्ने र त्यसलाई पछि कम्प्युटरबाटै लेटर ग्रेडिङमा लैजाने तयारी भएको छ । प्राविधिक कठिनाइ नभएमा यही महिनाको अन्त्यसम्ममा सबै काम सक्ने गरी तयारी भएको पनिका स्रोतले जनाएको छ । 

६० हजार बढे परीक्षार्थी करिब तीन हजारले प्राविधिक एसएलसी परीक्षा दिएका छन् । यस वर्षको एसएलसीमा नियमित र एक्ज्याम्टेड दुवैतर्फ विद्यार्थीको संख्या बढेको छ । एसएलसीमा अघिल्लो वर्षको भन्दा झन्डै ६० हजार विद्यार्थी बढेका छन् । परीक्षा नियन्त्रक काप्रीका अनुसार यस वर्ष नियमित र एक्जाम्टेडतर्फ गरी कुल ६ लाख १५ हजार पाँच सय ५३ विद्यार्थीले एसएलसी परीक्षाका लागि आवेदन फारम भरेका थिए् । 

नियमिततर्फ चार लाख ५२ हजार आठ सय ८१ र एक्ज्याम्टेडतर्फ एक लाख ५९ हजार चार सय १७ विद्यार्थीले आवेदन फारम भरेका छन् । अघिल्लो वर्षको एसएलसीमा नियमितमा चार लाख १० हजार चार सय ३७ र एक्ज्याम्टेड एक लाख ४५ हजार दुई सय ५१ गरी पाँच लाख ५५ हजार ६ सय ८८ परीक्षार्थी सहभागी भएका थिए । 

यस वर्ष ५९ हजार आठ सय ६५ बढेर ६ लाख १५ हजार पाँच सय ५३ ले आवदेन भरेका थिए । नियमिततर्फ ४२ हजार चार सय ४४ र एक्ज्याम्टेडतर्फ १४ हजार एक सय ६६ बढेका थिए । ग्रेडिङ प्रणालीकै कारण परीक्षार्थीको संख्यामा वृद्धि एक्ज्याम्टेडमा परेका विद्यार्थी बढ्नुको एउटा मुख्य कारण ग्रेडिङ हुन सक्ने परीक्षा नियन्त्रक काप्रीको दाबी छ । 

एक्ज्याम्टेडमा प्रत्येक वर्ष एक–दुई हजारको फरक हुनेमा यो वर्ष १४ हजारभन्दा बढी थपिएका छन् । विगतमा जस्तो यस वर्ष पास वा फेल नभनी ग्रेडमा मात्र मूल्यांकन हुने भएकाले पहिले परीक्षा दिन छाडेकाले पनि फारम भरेको हुनसक्ने काप्रीको तर्क छ । आजको नयाँ पत्रिका दैनिकमा समाचार छापिएको छ ।