दुधेदेवीमा बहुविपद् प्रतिरोधात्मक सुविधासम्पन्न भवन

Posted on: February 06, 2020 | views: 75

जोङडाँडा । सूर्यगढी गाउँपालिकाको वडा नं. १ को जोङडाडामा रहेको दुधेदेवी आधारभूत विद्यालयमा निर्माण गरिएको नौ कोठे पक्कि भवनको बुधबार प्रतिनिधिसभाका सदस्य एंव पूर्वमन्त्री हितबहादुर तामाङले उद्घाटन गर्नुभएको छ ।

जापानी सहयोग नियोग जाइकाको तर्फबाट ऋण सहायेगमा जिल्ला आयोजना कार्यान्वयन इकाई मार्फत निर्माण गरिएको बहुविपद् प्रतिरोधात्मक भवन विनासकारी भूकम्पले पुराएको क्षतिको विनास पछिको विकासको रुपमा बनेको नयाँ भवनको सही रुपमा सदुपयोग गर्नको लागी प्रतिनिधिसभा सदस्य तामाङले आग्रह गर्नुभयो । 

भूकम्पको कारण पीडामा रहेका नेपालीको लागी जापानी ऋण सहयोगबाट निर्माण गरिएको नयाँ भवनको संरक्षण गर्दै शिक्षामा गुणस्तर तथा क्षमतावान विद्यार्थी उत्पादनको लागी सहयोग पुग्ने विश्वास लिएको बताउनुभयो ।

विद्यालयमा निर्माण गरेको नयाँ भवनको उद्घाटन एंव हस्तान्तरण कार्यक्रममा जिल्ला आयोजना कार्यान्वयन इकाई शिक्षाका इकाई प्रमुख दिनानाथ गौतमले विनासकारी भूकम्पको कारण क्षति पुगेका विद्यालयको भवन लगातयका सरकारी संरचना निर्माण नेपाल सरकारले समयमै पूरा गर्नको लागी चुनौती रहेकाले दाताको सहयोगमा निर्माण भएको विद्यालयमा अब शिक्षामा गुणस्तरीयता र विद्यार्थी सङ्ख्या बढाउनको लागी आग्रह गर्नुभयो ।

इकाई प्रमुख गौतमले विद्यालय भौतिक रुपमा सम्पन्न हुदैमा शिक्षामा सुधार नहुने भन्दै प्रविधियुक्त शिक्षा, सामूहिक छलफल, नमूना अभ्यास तथा प्रयोगात्मक शिक्षामा जोड दिनको लागी सुझाब दिनुभयो । लच्याङको जोङडाडामा रहेको दूधेदेवी आधारभूत विद्यालयको नयाँ भवन उद्घाटन कार्यक्रममा नेकपाका नेता पुष्प लामिछाने ‘अरुण’ले शिक्षाको गुणस्तर र त्यसमा पनि सामुदायिक विद्यालयमा खस्कदै गएको शिक्षाको विकासले समाजमा परिवर्तन गराउन सक्नुपर्ने बताउनुभयो । 

कार्यक्रममा सूर्यगढी गाउँपालिकाको प्रमुख प्रशासकीय अधिकृत यज्ञश्वर पाण्डे, शिक्षा शाखा प्रमुख रमेश गिरी, वडा नं. ५ का वडाध्यक्ष भैरवबहादुर अधिकारी, वडा नं .१ का वडासचिव दिनेश श्रेष्ठ, विभिन्न विद्यालयका शिक्षक प्रतिनिधि, व्यवस्थापन समितिका प्रतिनिधि लगायतका अतिथीहरुले भवन एंव भौतिक संरचनाको निर्माणसगैँ अब दुधेदेवी आधारभूत विद्यालयले प्रवाह गर्ने शिक्षालाई गुणस्तरीय बनाएर विद्यार्थी सङ्ख्या बढाउनको लागी पहल गर्नुपर्ने सुझाब दिएका छन् ।  

तीन करोड ३६ लाख रुपैयाँ लगानीमा निर्माण गरिएको विद्यालय जाइका मार्फत निर्माण गराउनको लागी छनोटमा पार्न देखि समयमै गुणस्तरीय बनाएर कार्य सम्पन्न गर्न आफूले पुराएको योगदानलाई आगामी दिनमा शिक्षामा गुणस्तरीय बनाउन प्रतिबद्ध रहने वडाध्यक्ष समेत रहनुभएका विद्यालय व्यवस्थापन समितिका अध्यक्ष इमानसिंह तामाङले बताउनुभयो ।