अमर र आयुषा लिटिल वल्र्ड एम्बेस्डरमा छनोट

Posted on: May 02, 2016 | views: 287

भक्तपुर,चैत २७  । जिल्लाको दूधपाटी–१७ मा रहेको लिटिल वल्र्ड माध्यामिक विद्यालयले आफ्ना दुई विद्यार्थी अमर र आयुषालाई ‘लिटिल वल्र्ड एम्बेस्डर’ छनोट गरेको छ । छात्रतर्फ कक्षा ६ मा अध्ययनरत अमरजंग थापा र छात्रातर्फ कक्षा ७ मा अध्ययनरत आयुशा शील्पकारलाई विद्यालयले आगामी शैक्षिक सत्रभरका लागि लिटिल वल्र्ड एम्बेस्डर छनोट गरेको हो ।

२१औँ शताब्धीको शिक्षालाई गुणस्तरीय, व्यवहारिक र समयाअनुकुल बनाउनुपर्ने भन्दै विद्यालयले ती दुई विद्यार्थीलाई विद्यालयको आकर्षणको रूपमा ‘लिटिल वल्र्ड एम्बेस्डर’ नाम दिएर छनोट गरेको हो । एम्बेस्डर घोषित विद्यिार्थीहरूसँग विद्यालयका अन्य विद्यार्थीहरूले पनि प्रतिस्पर्धा गरेका थिए ।
 
गत बिहीबार विद्यालय प्राङ्गणमा भएको एक विशेष कार्यक्रममा एम्बेस्डर छनोटका लागि ट्यालेन्ट हन्ट, विभिन्न सांस्कृतिक कार्यक्रम तथा अन्य अतिरिक्त क्रियाकलापहरूमा विद्यार्थीहरूलाई प्रतिस्पर्धा गराइएको विद्यालयले जनाएको छ । प्रतिस्पर्धामा छात्रतर्फ अनुश कायस्थ र रोनक शील्पकार क्रमशः फस्र्ट र सेकेन्ड रनरअप भएका थिए भने छात्रातर्फ रक्षा पोखरेल र सृष्टि श्रेष्ठ क्रमशः फस्र्ट र सेकेन्ड रनरअप भएका थिए । लिटिल वल्र्ड एम्बेस्डर छनोटका लागि कान्तिपुर टेलिभिजनका समाचार बाचक रूपेश श्रेष्ठ, समाचार बाचिका समृद्धि रिजाल र सञ्चारकर्मी किरण खनाल तथा कलाकारहरू उपस्थित थिए ।

एम्बेस्डर घोषित छात्र–छात्रालाई विद्यालयले लिँदै आएको मासिक शुल्कमा ३० प्रतिशत छात्रवृत्तिस्वरूप छुट दिने घोषणा गरेको जानकारी विद्यालयका अध्यक्ष पदमध्वज कार्कीले दिएका छन् । त्यस्तै लिटिल वल्र्डमा अध्ययनरत सम्पूर्ण विद्यार्थीमा रहेको विभिन्न प्रतिभाहरूलाई प्रस्फुटन गराउन विद्यालयले समान वातावरण बनाउने प्रतिबद्धता पनि अध्यक्ष कार्कीले जनाएका छन् । विद्यार्थीहरूको प्रतिभा र क्षमताअनुसारको विभिन्न भूमिकामा विद्यार्थीहरूलाई सहभागी गर्दै लैजाने पनि उनले बताएका छन् ।

विद्यालयको वार्षिकोत्सवको अवसरमा आयोजित उक्त कार्यक्रमको उद्घाटन प्रमुख अतिथिकी रूपमा रहेकी नायिका केकी अधिकारीले गरेकी थिईन् । कार्यक्रममा विद्यालयले विभिन्न समयमा आयोजना गरेको अतिरिक्त क्रियाकलाप र गतिविधिहरूमा उत्कृष्ठ विद्यार्थीहरूलाई पुरस्कार वितरण गरिएको थियो ।
त्यसैगरी कार्यक्रमका अवसरमा सोही विद्यालयमा प्रिस्कुल पूरा गरी कक्षा १ मा प्रवेश गर्न लागेका २६ जना विद्यार्थीहरूलाई पोष्ट ग्राजुएशन गराइएको थियो । विद्यालयले आगामी शैक्षिकसत्रका लागि विभिन्न कार्यक्रमहरू पनि घोषणा गरेको छ ।