कविलासको नवसञ्जिवनी माविको ३५ औ बार्षिक उत्सव सम्पन्न (फोटो फिचर )

Posted on: November 18, 2018 | views: 133

नुवाकोट । नेपाली काँग्रेसका केन्द्रीय सदस्य एवम् प्रभावशाली नेता डाक्टर रामशरण महतले शिक्षाको विकास मार्फत समुदाय रुपान्तरणमा जोड दिनुपर्ने बताउनुभएको छ ।

पञ्चकन्या गाँउपालिकाको वडा नं. २ कविलासमा रहेको नवसञ्जिवनी माध्यामिक विद्यालयको ३५औ बार्षिक उत्सव समारोह तथा अभिभावक भेलालाई सम्बोधन गर्दै पूर्वअर्थमन्त्री समेत रहनुभएका डाक्टर महतले शैक्षिक जनशक्तिले नै देशलाई आर्थिक रुपमा समृद्धि र प्राविधिक रुपमा सम्मुन्नत बनाउन सक्ने भएकाले शिक्षाको विकासको लागी स्थानीयदेखि केन्द्र सरकारले प्रथामिकता दिनुपर्ने बताउनुभएको छ ।


उहाँले अभिभावकहरुलाई पनि सस्थागत विद्यालयको तुलनामा सामुदायिक विद्यालय प्रतिको दृष्टिकोण सकारात्मक नभएकाले शिक्षाको गुणस्तर बृद्धिको लागी विद्यालय प्रशासन, विद्यार्थी, शिक्षक र अभिभावक चारवटै खम्बाको रुपमा सहकार्य हुनुपर्ने बताउनुभएको छ ।

कार्यक्रममा, जिल्ला समन्वय समितिका प्रमुख सन्तमान तामाङ, नेपाली काँग्रेसका जिल्ला सभापति जगदीशनरसिंह केसी, महासमिति सदस्य रमेशकुमार महत, दुप्चेश्वर गाँउपालिका अध्यक्ष योबिन्द्रसिंह तामाङ, तादी अध्यक्ष नारायणप्रसाद पाण्डे, सूर्यगढी गाँउपालिका अध्यक्ष सन्तबहादुर घले, उपाध्यक्ष मञ्जु ढकाल, पञ्चकन्या गाँउपालिका उपाध्यक्ष सिता खड्का लगायतले शैक्षिक सस्थालाई पवित्र स्थल एवम् शान्ति क्षेत्रको रुपमा विकास गरेमात्र दक्ष विद्यार्थी उत्पादन गर्न सकिनेमा जोड दिनुभएको छ ।


कार्यक्रममा विद्यालय व्यवस्थापन समितिका अध्यक्ष कृष्ण मिश्रले श्रोत र साधनको अभावले विद्यालयको शैक्षिक विकासको लागी चुनौती बन्दै आएको गुनासो गर्नुभएको छ । उहाको अनुसार भूकम्पले भत्किएका विद्यालयहरु चार कोठा सम्पन्न भएपनि बाँकीको मर्मत तथा पुर्ननिर्मँण भइरहेको, दबरन्दी अभावले आधारभूत तहका शिक्षकबाट माध्यामिक तहको अध्यापन गराउनुपर्ने बाध्यता, कक्षा दश मात्र चल्दै आएको विद्यालयलाई आर्थिक अभावले प्राविधिक तथा कक्षा १२ सम्म पु-याउन कठिनाई भएको छ ।


कार्यक्रममा विद्यालयलाई राजनीतिज्ञ तथा व्यवसायी भरत खड्काले एक लाख रुपैयाँ सहयोग स्वरुप प्रदान गर्नुभएको थियो ।