प्याब्सन अध्यक्ष सहितको तीन निजी विद्यालय मर्ज (विज्ञप्ती)

Posted on: May 03, 2016 | views: 263

काठमाडौ,चैत २४ । गुणस्तरीय शिक्षा उपलब्ध गराउन उदेश्यका साथ राजधानीमा सञ्चालित तीन निजी विद्यालय गाभिएर एउटै भएका छन् । ‘धेरैबाट एक र त्यसभित्र मजबुतीको आधार’ खोज्ने नेपाल सरकारको समायोजन नीतिलाई आत्मसात गरी  डिल्लीबजारस्थित सूर्योदय आवासीय मावि, मैतीदेवीस्थित आनन्दभूमि मावि र अनामनगरस्थित ब्ल्युस्काई मावि समायोजन भई एसएबी पब्लिक स्कुल बनेको हो ।

सूर्योदयको ३१ वर्ष, आनन्दभूमिको २९ वर्ष र ब्ल्यू स्काईको १९ वर्ष गरी करीब ८० वर्षे शैक्षिक अनुभवलाइ समेटेर बनेको एसएबी पब्लिक आगामी दिनमा भरपुर प्रयोग गर्दै विश्व बजारको माग अनुसारको दक्ष जनशक्ति उत्पादन, समयानुकूल शिक्षण पद्धति, सुविधा सम्पन्न भौतिक पूर्वाधार, विज्ञान एवम् कम्प्युटर प्रयोगशाला, इ–लाइब्रेरी, डिजिटल कक्षाकोठा, असल एवम् सु–संस्कृत ऊर्जाशील तथा प्रतिस्पर्धी असल पुस्ताको निर्माण, आर्थिक, भौतिक तथा सामाजिक एवम् सांस्कृतिक सम्वृद्धिमा  केन्द्रित रहने विज्ञप्तीमा जनाईएको छ । 

सूर्योदय निजी तथा आवासीय विद्यालय संगठन नेपाल (प्याब्सन)का अध्यक्ष लक्ष्यबहादुरको हो भने आनन्दभूमि प्याब्सनका पूर्वअध्यक्ष भोजबहादुर शाहीको हो। ब्ल्युस्काई भने प्याब्सन सदस्य प्रेम ओलीको हो । समायोजनपछि एसएबीमा विद्यार्थी संख्या हजार नाघेको छ।

प्रेस विज्ञप्ति
‘धेरैबाट एक र त्यसभित्र मजबुतीको आधार’ खोज्ने नेपाल सरकारको समायोजन नीतिलाई आत्मसात गरी सूर्योदय आवासीय माध्यमिक विद्यालय, आनन्दभूमि हाई स्कुल र ब्ल्यू स्काई पब्लिक स्कुलको समायोजनसँगै सूर्योदय एजुकेशन फाउण्डेसन अन्तर्गत एस.ए.बि. पब्लिक स्कुल (SAB Public School) बनी नयाँ उदेश्य र गन्तव्यसहित अघि बढेको कुरा सहर्ष जानकारी गर्दछौँ । आफ्नो स्थापनासँगै सूर्योदयको ३१ वर्ष, आनन्दभूमिको २९ वर्ष र ब्ल्यू स्काईको १९ वर्ष गरी करीब ८० वर्षे शैक्षिक अनुभवलाई आगामी दिनमा भरपुर प्रयोग गर्दै विश्व बजारको माग अनुसारको दक्ष जनशक्ति उत्पादन, समयानुकूल शिक्षण पद्धति, सुविधा सम्पन्न भौतिक पूर्वाधार, विज्ञान एवम् कम्प्युटर प्रयोगशाला, इ–लाइब्रेरी, डिजिटल कक्षाकोठा, असल एवम् सु–संस्कृत ऊर्जाशील तथा प्रतिस्पर्धी असल पुस्ताको निर्माण, आर्थिक, भौतिक तथा सामाजिक एवम् सांस्कृतिक सम्वृद्धिमा हामी केन्द्रित रहने कुरा विश्वस्त गर्न चाहन्छौँ । 

हाम्रो कार्यगत समयोजन तथा एकता पश्चात देहाय बमोजिम विशिष्ट उदेश्य सहित अघि बढ्ने कुरा जानकारी गर्दछौँ ।
१.    विद्यालयको दिगो विकास एवम् स्तरोन्नतिमा यो प्रक्रियाले ठुलो मद्दत पुग्ने विश्वास लिइएको ,
२.    अन्तर्राष्ट्रिय अध्ययन अध्यापन एवम् शिक्षण सिकाइमा सहजता कायम गर्नका लागि अमेरिकन नागरिक मार्क विबर्सलाई प्रिन्सिपलको भूमिका दिदै उहाँकै शैक्षिक नेतृत्वमा विद्यालयलाई अगाडि बढाइने, 
३.    नयाँ गति, समय सापेक्षित एवम् समयानुकूल प्रयोगात्मक शिक्षा प्रदानमा विशेष जोड दिइने,
४.    पढाइका अतिरिक्त खेलकुद, सङ्गीत, नृत्य, नाट्य अभिनय कला, नेतृत्व विकास प्रशिक्षण, स्काउट, योगा लगायत बालबालिकामा अन्तर्निहीत क्षमताको सर्वाङ्गीण विकासलाई अगाडि बढाइने,
५.    अन्तर्राष्ट्रिय मापदण्डभित्र, विज्ञान र प्रविधिको अधिकतम प्रयोग गर्दै समयानुकूल विश्व बजारमा सहजै प्रतिस्पर्धामा उत्रन सक्ने दक्ष जनशक्तिको उत्पादनमा केन्द्रित रहने,
६.    प्रत्येक चाडपर्व एवम् विशेष महत्व बोकेका राष्ट्रिय तथा अन्तर्राष्ट्रिय महत्वपूर्ण अवसरहरूलाई फरक ढङ्ले अनुभूत गर्ने अवसर दिई बालबालिकामा मौलिक संस्कार र परम्पराको पुनर्जागरणमा अभियान चलाइने,
७.    अनुभवि, दक्ष एवम् तालिमप्राप्त शिक्षक शिक्षिकाहरूबाट विद्यार्थी केन्द्रित अत्याधुनिक सूचना र प्रविधि (IT)    को प्रयोग गरी अध्ययन अध्यापन गराइने,
८.    अमेरिका, अष्ट्रेलिया, यूरोप लगायतका देशहरूसँग विद्यार्थी आदान–प्रदान (Student Exchange Programme)  सञ्चालन गरिने,
९.    हाल सूर्योदय विद्यालय रहेको भवनमा प्राइमरी ब्लक र आनन्दभूमि विद्यालय रहेको भवनमा सेकन्डरी ब्लक रहने र करिब एक वर्षपछि सुविधा सम्पन्न भवनको निर्माण सम्पन्न भएसँगै सम्पूर्ण कक्षा तथा प्रशासनिक एकाइहरू सूर्योदय ब्लकबाटै सञ्चालन गरिने
१०.    हामी यस अवसरमा नेपाल सरकारसँग यो अनुरोध गर्न चाहन्छौँ कि अन्य वित्तिय संस्थाहरू समयोजन हुँदा जसरी नै मानव संशाधनको मिलान, कर छुट लगायत अन्य विशेष योजना अघि सार्नुका साथै नेपाल सरकार शिक्षा मन्त्रालयको विद्यालय समायोजन नीतिलाई हामी उदाहरण नै बनेर प्रस्तुत हुन चाहन्छौँ । 

अन्तमा नयाँ उदेश्य र गन्तव्य सहित अघि बढेका हामीहरू आगामी दिनमा समयको मागलाई पुरा गर्नु नै हाम्रो अभिष्ट रहेको कुरा यहाँहरूसमक्ष अवगत गराउन चाहन्छौँ ।