जापान सरकारको सहयोगमा मंगलादेवीमा सुविधासम्पन्न भवन

Posted on: August 03, 2018 | views: 1192

१७ साउन, छाप, लच्याङ, नुवाकोट । जापान सरकारको सहुलियतपूर्ण ऋण सहयोगमा जापानी सहयोग नियोग (जाइका) मार्फत नुवाकोटको सूर्यगढी गाँउपालिका वडा नं. १ लच्याङ्ग स्थित छापमा रहेको मंगलादेवी आधारभूत विद्यालयमा निर्माण गरिएको बाह्र कोठे पक्कि भवन समुदायलाई हस्तान्तरण गरिएको छ ।


तीन वर्षअघिको विनासकारी भूकम्पले पूर्ण क्षति पु-याएको विद्यालयको लागी नयाँ भवन जापान सरकारको सहुलियतपूर्ण ऋण सहयोगमा तीन करोड ३९ लाख ३३ हजार रुपैयाँ लगानीमा निर्माण गरिएको भूकम्प प्रतिरोधि सहित बहुविपद् प्रतिरोधात्मक भवनको बिहीबार एक कार्यक्रमकाबीच समुदायको लागी विद्यालय प्रशासनलाई हस्तान्तरण गरिएको हो । विद्यालय हस्तान्तरण कार्यक्रममा जिल्ला समन्वय समितिका प्रमुख शन्तमान तामाङले सुबिधासम्पन्न भवन निर्माण भएकाले यसको संरक्षण गर्दै विद्यालयबाट ज्ञान प्राप्त गर्न समुदायलाई आग्रह गर्नुभयो ।


यस्तै, गाँउपालिकाको उपाध्यक्ष मञ्जु बुढाथोकीले भवन संरचनाको निर्माणसगै विद्यार्थीलाई आधुनिक तथा समयसापेक्ष अध्ययनमा जोड दिनको लागी पाठ्यक्रमको निर्माण, विषयगत शिक्षामा समेत जोड दिनुपर्ने बताइन् ।
कार्यक्रममा उक्त विद्यालय व्यवस्थापन समितिका पदेन सदस्य समेत रहनुभएका वडा नं. १ का वडाध्यक्ष इमानसिंह तामाङले लच्याङको शिक्षाको अवबस्था निकै कमजोर भएको र माध्यामिक तहसम्मको अध्ययन गर्ने विद्यालय समेत नभएकाले त्यसमा नयाँ निर्माण भएको भवनको सदुपयोग गर्न सरोकारवालाहरुबाट सहयोग हुनुपर्ने बताउनुभयो ।


शिक्षा विकास तथा समन्वयन इकाई नुवाकोटका प्रमुख मदनकुमार थापाले शिक्षा सुधारको लागी भौतिक संरचनाको निर्माणको साथसाथै विद्यालय प्रशासन र सरोकारवालाहरु गम्भीर भएर क्रियाशिल हुनुपर्ने बताउनुभयो
नयाँ निर्माण गरिएको भएको भवनको साचो र निर्माण सम्पन्न प्रमाणपत्र निर्माणको जिम्मेवारी पाएको कम्पनीका प्रतिनिधि गणेशबहादुर तामाङले राष्ट्रिय पुर्ननिर्माण प्राधिकरण जिल्ला आयोजना कार्यान्वयन इकाई शिक्षाको नुवाकोट प्रमुख बीरेन्द्रजंग थापालाई प्रदान गरेपछि उक्त साचो र प्रमाणपत्र उहाँले विद्यालय व्यवस्थापन समितिका अध्यक्ष चक्रबहादुर तामाङलाई प्रदान गर्नुभयो । उक्त विद्यालयको साचो र निर्माण सम्पन्नताको प्रमाणापत्र प्रदान गर्दै इकाई प्रमुख थापाले नुवाकोटमा भूकम्पले क्षति पु-याएका विद्यालयको पुर्ननिर्माण अन्तिम चरणमा पुगेकाले अब शिक्षाको गुणस्तरीयतामा सबैपक्षबाट एक्यबद्धताको आवश्यकता रहेको बताउनुभयो ।


उहाँको अनुसार जापान सरकारको ऋण सहयोगमा ‘आपतकालीन विद्यालय पुर्ननिर्माण’ कार्यक्रम मार्फत केन्द्रीय ठेक्का प्रणालीबाट सम्झौता भएको मंगलादेवी विद्यालय सहित ५७ विद्यालय मध्ये यसअघि रालुका मावि विद्यालय समुदायलाई हस्तान्तरण भइसकेको र अब केहीको निर्माण सम्पन्न नजिक र केही ठेक्का प्रणाली मार्फत काम सुरु गर्न लागिएको छ ।


विद्यालय भवन हस्तान्तरण कार्यक्रममा विद्यालय व्यवस्थापन समितिका अध्यक्ष तामाङले आधारभूततहसम्म अध्ययन हुदै आएको मंगलादेवी विद्यालयमा विद्यार्थी सङ्ख्या प्रायाप्त भएको र सूर्यगढी गापाको वडा नं. १ मा एउटा पनि मावि विद्यालय नभएकाले कक्षा बृद्धि गर्दै लैजाने सोच रहेको बताउनुभयो ।


यस्तै प्रधानध्यापक दत्तप्रसाद न्यौपानेले विद्यालयमा हाल साढे तीन सय भन्दा बढी विद्यार्थी अध्ययनरत रहेकाले उनीहरुको लागी भवन सहित भौतिक सामाग्रिको समस्या पूरा भएकाले अब शिक्षाको गुणस्तरीयतामा बृद्धि गर्न आफूहरु केन्द्रित हुने प्रतिबद्धता जनाउनुभयो । प्रअ न्यौपानेको अनुसार विद्यार्थीको लागी माध्यामिक तहसम्म अध्यापन गराउने लक्ष्य, हिउदको समयमा चरम अभाव हुने खानेपानीको व्यवस्थापन, कम्युटर कक्षा, पुस्तकालय, विज्ञान प्रयोगशालाको आवश्यकता पूरा गरी शिक्षामा विद्यार्थीको आकर्षण बढाउन लक्ष्य बनाइएको छ ।


जाइकामा मार्फत कार्यरत डिजाइन एण्ड सुपरिभिजन कन्सल्टेनका जिल्ला अनुगमन ईञ्जिनियर गणेश कंडेलको अनुसार जापान सरकारको सहयोगमा निर्माण भइरहेका ५७ मध्ये निर्माण सम्पन्न भएको श्याम सुन्दर, हिमडुङ्ग एण्ड थोकरले सयुक्त रुपमा निर्माणको जिम्मेवारी पाएको मंगलादेवी विद्यालय तोकिएको समयमा उक्त कम्पनीको पहिलो र जाइका मार्फत निर्माण भइरहेको मध्ये दोश्रो विद्यालयको रुपमा निर्माण सम्पन्नको नजिक पुगेकाले हस्तान्तरण सम्पन्न गरे पनि पूरा गर्न बाँकी रहेका केही संरचना समयमा नै सम्पन्न गर्न निर्देशन दिइएको छ ।


निर्माणको जिम्मेवारी पाएको कम्पनीका प्रतिनिधि गणेशबहादुर तामाङले विद्यालयको कक्षाकोठा निर्माण सम्पन गरी अस्थायी टहरमा अध्ययन गर्दै आएका विद्यार्थीलाई पक्कि भवनमा स्थान्तरण गर्न भवन हस्तान्तरण गरिएकाले बाँकी रहेको निर्माणको कामलाई तोकिएको मापदण्ड अनुसार नै पूरा गरिने प्रतिबद्धता जनाउनुभयो ।