लिखुका विद्यार्थीबाट २१ नयाँ उपकरण अविस्कार

Posted on: June 05, 2018 | views: 558

अशोक ढकाल
खानीगाँउ । ‘नुवाकोट बिज्ञान क्लब’मा आबद्ध यहाँको विद्यार्थीले विभिन्न २१ प्रकारका आधुनिक तथा विद्युतीय माध्यमका नयाँ उपकरण अविस्कार गरेका छन् ।
लिखु गाँउपालिकामा जन्मेर डिप्लोमा ईञ्जिनियर अध्ययनरत विद्यार्थीहरु मिलेर क्लब मार्फत ड्रोन, सुरक्षा संवेदनशीलता उपकरण, हाइड्रोलिक डोजर, सेन्सर लगायतका पछिल्लो समयको विकसित आधुनिक उपकरणहरु अविस्कार गरेका हुन् । उक्त उपकरण लिखु गाँउपालिका–१ स्थित नारायणदेवी माविमा प्रदर्शनी समेत गरिएको छ । 
अध्ययनको क्रममा सिकेको सिपलाई अभ्यासको माध्यमबाट व्यवहारमा उतार्न सफल भएको क्लबका अध्यक्ष नरेश्वर पाण्डेले जानकारी दिनुभयो ।
“बट्टार स्थित शुभेनियर बोर्डिङ स्कुलबाट विसं २०७२ सालको माध्यामिक शिक्षा परीक्षामा लिखु गाँउपालिकाबाट सहभागी विद्यार्थी मात्र क्बलमा आबद्ध छौ ।” अध्यक्ष पाण्डेले भन्नुभयो “विद्यालयतह, दश जोड दुई र अहिले केन्द्रीय क्याम्पसमा डिप्लोमा इन ईञ्जिनियर अध्ययनका क्रममा पाठ्यक्रममा उल्लेखित विषयवस्तुको सहयोगले नयाँ उपकरणको अविस्कार गर्न सफल भएका हौ ।”
राती आफै बल्ने र दिउँसो आफै निभ्ने बत्ति, सेन्सर मार्फत चल्ने स्वचालित धारो र पानी तान्ने उपकरण, हाइड्रोलिक डोजर, विद्युतीय नियन्त्रक उपकरण लगायतका प्रविधि दैनिक जीवनमा प्रयोग गरी लाभ लिन सकिने क्बलका उपाध्यक्ष जनार्दन ढकालले जानकारी दिनुभयो ।
“ड्रोनको निर्माण अन्तिम चरणमा पुगेकाले अब परीक्षणको क्रममा छ तर, सञ्चालन तथा उपयोगको लागी कानूनी समस्याले ढिलाई भइरहेको छ ।” ढकालले  भन्नुभयो ।
२१ प्रकारका नयाँ अविस्कार निर्माण गर्न रु पाँच लाख खर्च भएको र त्यसमा केही लिखु गाँउपालिकाको समेत सहयोग छ । “सामाग्रि खरिदमा धेरै लगानी नहुने भएपनि यसमा मिहेनत खर्चनु पर्र्छ ।” उहाँले भन्नुभयो “यसअघिका अविस्कार र आधुनिक समाजको मानवीय जीवनको दैनिकीमा सहयोग पुग्ने उपकरण निर्माणमा लाग्ने अब सोच बनाएका छौ ।”
क्बलमा आबद्ध विद्यार्थीहरु हाल सुरक्षा प्रणाली, सेन्सर, स्वचालित र रोबट प्रणाली लगायतका उपकरण निर्माणमा जुटेका छन् ।