एसएलसी परीक्षार्थी । घरदेखि केन्द्रसम्म नै टहरोमा

Posted on: May 02, 2016 | views: 200

प्रमिला सुनार-२१ चैत, त्रिशुली, नुवाकोट ।
विद्यालय तहको अन्तिम कक्षाको रुपमा रहेको प्रवेशिका अर्थात एसएलसी परीक्षा विद्यार्थीहरुले टहरामा नै बसेर दिएका छन् । भूकम्पको कारण घरबास गुमाएका विद्यार्थीहरुले अस्थायी आावासको लागी बनाएको टहरामा तयारी गरी परीक्षापनि टहराबाट नै दिएका छन् ।

जारी रहेको एसएलसी परीक्षाको पहिलो दिनको परीक्षा दिएका नुवाकोटका विद्यार्थीहरुले भूकम्पको कारण घर, विद्यालयमा पुगेको क्षतिले राम्रोसंग तयारी गर्न नसकेकाले अपेक्षा गरे अनुसारको परीक्षालाई राम्रो बनाउन नसकेको बताए ।

शुलक्षण उच्चमाविमा अध्ययन गरी ओममाने पब्लिक स्कुलबाट परीक्षा दिएका आयुश सुब्बाले पाल, त्रिपाल र जस्तापाताको टहरामा बसेर अध्ययन गर्दा पनि आधा पनि कोर्स सकिएको थिएन्, परीक्षा अपेक्षा गरेअनुसार राम्रो गर्न सकिएन ।

शिक्षा कार्यालय नुवाकोटका अनुसार नुवाकोटमा कायम गरिएको २३ वटा परीक्षा केन्द्र मध्ये १५ वटाको भवन जस्तापाताले छाएको अस्थायी टहराबाट सञ्चालन गरिएको छ । भवनहरुमा क्षति पुगेकाले नै सुन्दरी क्यौरिनी उच्चमावि गेर्खु र स्याउरेभूमे उच्चमावि सिक्रेको परीक्षा केन्द्र सारिएको छ । अस्थायी टहरा भएपनि व्यवस्थापनमा सहज हुने गरी मिलाएको जिल्ला शिक्षा अधिकारी चन्द्रबहादुर खड्काले बताए ।

अपाङ्ग र अशक्तलाई समस्या
तुप्चेको चण्डेश्वरी उच्चमाविमा अध्ययनत दृष्टिबिहिन विद्यार्थी राजेन्द्र रुम्बाले ओममाने पब्लिक स्कुल गेर्खुबाट परीक्षा दिएका छन । सामान्य विद्यार्थीहरुसगै बसेर अध्ययन गरेका रुम्बाले परीक्षा दिन सोही विद्यालयका कक्षा ८ का विपिन नेपाललाई सहयोगी राखेका छन् ।

सहयोगी मार्फत परीक्षा दिदाँ आफूले भने अनुसारले लेख्न नसक्ने, ह्रश्व–दीर्घ मिलाउन नजान्ने, हिज्जे र भाषाशैली समेत बिग्रने भन्दै ब्रेनलिपी मार्फत परीक्षा दिन पाउनुपर्ने माग गरेका छन् ।

“विद्यालयमा पढ्ने समयमा समेत सहयोग भएन्, परीक्षा दिने समयमा समेत परीक्षा नियन्त्रण कार्यालयले उपेक्षा गरेको छ ।” जिल्लाबाट एसएलसी परीक्षाको परीक्षा दिइरहेकालाई एक घण्टासम्म अतिरिक्त समय थप दिइएको जिल्ला शिक्षा अधिकारी खड्काले बताए ।